കാത്തിരിപ്പ് നീളില്ല; സാംസങിന്‍റെ ആദ്യ ട്രൈ-ഫോൾഡ് ഫോൺ 2025 അവസാനത്തോടെ പുറത്തിറങ്ങിയേക്കും
സാംസങ് ജൂലൈ 9-ലെ ഗാലക്സി അൺപാക്‌ഡ് ഇവന്‍റിൽ നിരവധി പുതിയ ഫോൾഡബിളുകളും (ഗാലക്സി സ്സെഡ് ഫോൾഡ് 7, ഫ്ലിപ്പ് 7, ഫ്ലിപ്പ് 7 എഫ്ഇ), സ്മാർട്ട് വാച്ചുകളും (വാച്ച് 8, വാച്ച് 8 ക്ലാസിക്) അവതരിപ്പിച്ചിരുന്നു. എന്നാൽ ഗാലക്സി പ്രേമികള്‍ കാത്തിരുന്ന ഒരു ഡിവൈസ് ഇതുവരെ പ്രത്യക്ഷപ്പെട്ടിട്ടില്ല. ദീർഘകാലമായി പറഞ്ഞുകേള്‍ക്കുന്ന ട്രൈ-ഫോൾഡ് സ്മാർട്ട്‌ഫോണായ ഗാലക്സി ജി ഫോൾഡ് ആണ് ഈ ഡിവൈസ്. എന്നാല്‍ ഈ ട്രിപ്പിള്‍ ഫോള്‍ഡബിള്‍ ഇപ്പോൾ വാർത്തകളിൽ വീണ്ടും നിറഞ്ഞിരിക്കുകയാണ്. 2025 അവസാനത്തോടെ സാംസങ് ട്രൈ-ഫോള്‍ഡ് ലോഞ്ച് ചെയ്യുമെന്ന് പ്രതീക്ഷിക്കുന്നതായി കൊറിയ ടൈംസ് റിപ്പോര്‍ട്ട് ചെയ്തുഒരു ട്രൈ-ഫോൾഡിംഗ് ഫോണിൽ കമ്പനി സജീവമായി പ്രവർത്തിക്കുന്നുണ്ടെന്ന് സാംസങിന്‍റെ മൊബൈൽ മേധാവി സ്ഥിരീകരിച്ചതായി കൊറിയ ടൈംസ് റിപ്പോർട്ട് ചെയ്യുന്നു. ഗാലക്സി അൺപാക്‌ഡ് ഇവന്‍റിന് ശേഷം മാധ്യമപ്രവർത്തകരോട് സംസാരിക്കവെ, ഈ വർഷം അവസാനം സാംസങ് ഈ ഡിവൈസ് പുറത്തിറക്കാൻ പദ്ധതിയിടുന്നതായി മൊബൈൽ മേധാവി ടി എം റോ വെളിപ്പെടുത്തി. ഉൽപ്പന്നത്തിന്‍റെയും അതിന്‍റെ ഉപയോഗക്ഷമതയുടെയും പൂർണത കൈവരിക്കുന്നതിലാണ് കമ്പനി ശ്രദ്ധ കേന്ദ്രീകരിക്കുന്നതെന്ന് അദ്ദേഹം പറഞ്ഞു. എങ്കിലും പേര് ഇതുവരെ തീരുമാനിച്ചിട്ടില്ല. ട്രൈ-ഫോൾഡ് ഫോണിന്‍റെ ലോഞ്ച് ടൈംലൈൻ സാംസങ് പരസ്യമായി അംഗീകരിക്കുന്നത് ഇതാദ്യമാണ്.ഔദ്യോഗിക ചിത്രമോ ടീസറോ ഇതുവരെ പുറത്തുവന്നിട്ടില്ലെങ്കിലും ഈ ഡിവൈസിൽ 10 ഇഞ്ച് ഒഎൽഇഡി പാനൽ ഉണ്ടായിരിക്കുമെന്ന് നേരത്തെ പുറത്തുവന്ന ലീക്കുകള്‍ സൂചന നൽകിയിരുന്നു. ഇത് രണ്ടുതവണ മടക്കാവുന്ന ഒരു കോംപാക്റ്റ് രൂപത്തിൽ അവതരിപ്പിക്കും. ഇത് സ്‌നാപ്ഡ്രാഗൺ 8 എലൈറ്റ് ചിപ്പിലും പ്രവർത്തിക്കും. ഈ ഫോണിന് 2,900 ഡോളർ (ഏകദേശം 2.49 ലക്ഷം രൂപ) വരെ വിലവരും. എങ്കിലും ആദ്യ തലമുറ മോഡൽ തുടക്കത്തിൽ ദക്ഷിണ കൊറിയയിലും ചൈനയിലും മാത്രമേ ലോഞ്ച് ചെയ്യൂ എന്ന് റിപ്പോർട്ടുകൾ പറയുന്നു. രണ്ടാം തലമുറ മോഡൽ 2026-ൽ മാത്രമേ ആഗോളതലത്തിൽ പുറത്തിറങ്ങൂ.ഫോൾഡിംഗ് ലൈനപ്പിൽ ശ്രദ്ധ കേന്ദ്രീകരിക്കാൻ സാംസങ് നിരവധി പ്രഖ്യാപനങ്ങൾ ഗാലക്സി അൺപാക്ക്ഡ് ഇവന്‍റിൽ നടത്തിയിരുന്നു. പരിപാടിയിൽ ഗാലക്സി സ്സെഡ് ഫോൾഡ് 7 ഉം, ഗാലക്സി സ്സെഡ് ഫ്ലിപ്പ് 7 ഉം രണ്ടും മെലിഞ്ഞ ബോഡി, തിളക്കമുള്ള ഡിസ്‌പ്ലേകൾ, ബോർഡിലുടനീളം എഐ അപ്‌ഗ്രേഡുകൾ എന്നിവയോടെ ഔദ്യോഗികമായി പുറത്തിറക്കി. ഫോൾഡ് 7 ഇപ്പോൾ ഗാലക്സി എസ് 25 അൾട്രയെക്കാൾ ഭാരം കുറഞ്ഞതും 8 ഇഞ്ച് വലിയ ഇന്നർ ഡിസ്‌പ്ലേയുമായാണ് വരുന്നത്. ഫ്ലിപ്പ് 7ന് ഇപ്പോൾ ക്യാമറയ്ക്ക് ചുറ്റും 4.1 ഇഞ്ച് കവർ സ്‌ക്രീനും 6.9 ഇഞ്ച് വലിയ ഇന്‍റേണൽ സ്‌ക്രീനും ഉണ്ട്.